پاک-بھارت کشیدگی کے باوجود شاہ رخ خان نے اپنی ٹیم میں محمد عامر کو شامل کرلیا

انڈین پریمیئر لیگ (آئی پی ایل) کی مشہور فرنچائز کولکتہ نائٹ رائیڈرز کے مالک اور معروف بالی ووڈ اسٹار شاہ رخ خان نے پاک بھارت کشیدہ تعلقات کے باوجود اپنی ایک اور کرکٹ فرنچائز میں دو پاکستانی کرکٹرز کو شامل کر لیا ہے۔

تفصیلات کے مطابق کیریبین پریمیئر لیگ (سی پی ایل) کی ٹیم ٹرنباگو نائٹ رائیڈرز (ٹی کے آر)، جو شاہ رخ خان کی ملکیت ہے، نے پاکستان کے سابق فاسٹ بولر محمد عامر اور آف اسپنر محمد عثمان طارق سے معاہدہ کر لیا ہے۔

محمد عامر اس سے قبل بھی سی پی ایل کے چار سیزن کھیل چکے ہیں، جہاں انہوں نے 39 میچز میں شاندار کارکردگی کا مظاہرہ کرتے ہوئے 18.09 کی اوسط سے 51 وکٹیں حاصل کیں۔

دوسری جانب محمد عثمان طارق، جنہوں نے حالیہ پاکستان سپر لیگ (پی ایس ایل) میں کوئٹہ گلیڈی ایٹرز کی نمائندگی کی، پہلی بار ویسٹ انڈیز کی کنڈیشنز میں ڈیبیو کریں گے۔ انہوں نے پی ایس ایل 2024 کے صرف 5 میچز میں 10 وکٹیں حاصل کر کے سب کی توجہ حاصل کی تھی۔

یہ امر قابل ذکر ہے کہ شاہ رخ خان نہ صرف بالی ووڈ کے سپر اسٹار ہیں بلکہ کھیلوں، خاص طور پر کرکٹ میں بھی خاصی دلچسپی رکھتے ہیں۔ وہ دنیا بھر میں کئی کرکٹ فرنچائزز کے مالک ہیں، جن میں سی پی ایل کی ٹرنباگو نائٹ رائیڈرز بھی شامل ہے۔ یہ ٹیم اب تک 4 مرتبہ ٹورنامنٹ کا ٹائٹل اپنے نام کر چکی ہے اور سی پی ایل کی مضبوط ترین ٹیموں میں شمار ہوتی ہے۔

شاہ رخ خان کی جانب سے پاکستانی کھلاڑیوں کو اپنی فرنچائز کا حصہ بنانے کا فیصلہ ایسے وقت میں سامنے آیا ہے جب پاک-بھارت تعلقات میں تناؤ موجود ہے، اور بھارتی حکومت نے کئی برسوں سے پاکستانی کھلاڑیوں پر آئی پی ایل میں شرکت پر پابندی عائد کر رکھی ہے۔