طالبان نے گلبدین حکمت یار کے غیر ملکی سفر پر پابندی عائد کردی

کابل(مانیٹرنگ ڈیسک)افغان طالبان نے سابق وزیراعظم اور حزبِ اسلامی کے سربراہ گلبدین حکمت یار کو بیرون ملک جانے سے روک دیا۔گلبدین حکمت یار کے بیٹے حبیب الرحمان حکمت یار نے دعویٰ کیا ہے کہ طالبان حکومت نے ان کے والد کو بیرون ملک سفر کرنے کی اجازت نہیں دی۔

حبیب الرحمان نے ایکس پر لکھا کہ طالبان نہ صرف گلبدین حکمت یار کی عوام سے ملاقاتوں میں رکاوٹ ڈال رہے ہیں بلکہ ان ملاقاتوں سے خوفزدہ بھی ہیں اورانہیں خطرناک سمجھتے ہیں۔

انہوں نے کہا کہ طالبان دیگر سیاسی رہنماؤں سے ملک میں واپس آنے کی اپیل کرتے ہیں اور یہ دعویٰ کرتے ہیں کہ وہ ان کی سلامتی کی ضمانت دیتے ہیں لیکن میرے والد کے بیرونِ ملک سفر پر پابندی عائد کر دیتے ہیں۔

حبیب الرحمان حکمت یارنے کہا کہ کیا طالبان کا مقصد یہ ہے کہ سب رہنما واپس آئیں تاکہ وہ ان کی ملاقاتوں،سرگرمیوں اورسفرپرپابندیاں لگا سکیں؟

میڈیا رپورٹس کے مطابق گزشتہ4برسوں سے طالبان حکومت نے سیاسی رہنماؤں،سابق حکومتی شخصیات اور قبائلی عمائدین پر سخت پابندیاں عائد کر رکھی ہیں اور ان میں سے اکثر کو بیرونِ ملک سفر کی اجازت بھی نہیں دی جاتی۔