گل پلازہ سانحہ: خالد مقبول صدیقی نے وزیراعظم کو خط لکھ کر اعلیٰ سطحی انکوائری کمیشن کا مطالبہ کر دیا

کراچی (جانوڈاٹ پی کے)سانحہ گل پلازہ کے بعد چیئرمین ایم کیو ایم پاکستان خالد مقبول صدیقی نے وزیراعظم شہباز شریف کو خط لکھ کر اس المناک واقعے کی تحقیقات کے لیے اعلیٰ سطحی غیر جانبدار اور شفاف انکوائری کمیشن تشکیل دینے کا مطالبہ کر دیا ہے۔

خط میں خالد مقبول صدیقی نے تجویز دی کہ کمیشن میں ایف آئی اے، نیب، این ڈی ایم اے اور دیگر متعلقہ ادارے شامل کیے جائیں تاکہ تحقیقات جامع اور شفاف طریقے سے مکمل ہوں۔ انہوں نے وفاقی حکومت اور قانون نافذ کرنے والے اداروں سے فوری طور پر ریسکیو اور ریلیف کے انتظامات سنبھالنے کی بھی درخواست کی تاکہ انسانی اعضاء اور قیمتی اشیاء محفوظ رہ سکیں۔

خط میں مزید کہا گیا کہ وفاق کے زیرِ انتظام ریلیف اور بحالی فنڈ قائم کیا جائے تاکہ لواحقین اور متاثرین کو مالی مدد فراہم کی جا سکے۔ خالد مقبول صدیقی نے کہا کہ 7 روز گزر جانے کے باوجود کئی لوگ گمشدہ ہیں اور لواحقین کو اپنے پیاروں کی لاشیں نہیں ملی ہیں، جبکہ 12 ہزار سے زائد خاندان اس واقعے سے براہِ راست متاثر ہوئے ہیں۔

چیئرمین ایم کیو ایم نے خط میں الزام عائد کیا کہ سانحے میں ہلاکتوں اور مالی نقصانات کے براہِ راست ذمہ دار سندھ حکومت، صوبائی محکمے اور بلدیاتی ادارے ہیں۔ ان کے مطابق سندھ حکومت، میئر کراچی، ایس بی سی اے اور دیگر ادارے مجرمانہ غفلت کے مرتکب ہوئے ہیں۔